വാനനിരീക്ഷകർക്ക് ആനന്ദക്കാഴ്ചയൊരുക്കാൻ ഈ ആഴ്ച അവസാനം അപൂർവമായ ബ്ലൂ മൂൺ ആകാശത്ത് ദൃശ്യമാകും. ഒരൊറ്റ മാസത്തിൽ തന്നെ രണ്ടാമത്തെ പൂർണചന്ദ്രൻ പ്രത്യക്ഷപ്പെടുന്ന അപൂർവ പ്രതിഭാസമാണിത്. 2026 മേയ് 31-നാണ് ഈ പ്രതിഭാസം അതിന്റെ പാരമ്യത്തിൽ എത്തുക. എന്നിരുന്നാലും, മേയ് 30-ന് വൈകുന്നേരം സൂര്യാസ്തമയത്തിന് ശേഷം ചന്ദ്രൻ ഉദിക്കുന്ന സമയമായിരിക്കും ഇത് കാണാൻ ഏറ്റവും അനുയോജ്യമെന്ന് വാനനിരീക്ഷകർ വ്യക്തമാക്കുന്നു.
ഇന്ത്യയിൽ, മേയ് 31-ന് സൂര്യാസ്തമയത്തിന് തൊട്ടുപിന്നാലെ കിഴക്കൻ ചക്രവാളത്തിലാണ് ഈ ബ്ലൂ മൂൺ ദൃശ്യമാകുക. വ്യക്തമായ കിഴക്കൻ അല്ലെങ്കിൽ തെക്കുകിഴക്കൻ ചക്രവാളം ദൃശ്യമാകുന്ന ഒരു സ്ഥലത്തുനിന്ന് സൂര്യാസ്തമയത്തിന് ശേഷം നിരീക്ഷിക്കുന്നതാണ് ഇതിന് ഏറ്റവും അനുയോജ്യം.
എന്താണ് ബ്ലൂമൂൺ?
സാധാരണയായി ഒരു കലണ്ടർ മാസത്തിൽ പൂർണചന്ദ്രനെ കാണുന്ന ഒരു വെളുത്തവാവ് (പൗർണമി) മാത്രമാണ് ഉണ്ടാകാറുള്ളത്. ചന്ദ്രൻ ഭൂമിയെ ഒരു തവണ വലംവെക്കാൻ ഏകദേശം 29.5 ദിവസങ്ങൾ എടുക്കും. അതുകൊണ്ടുതന്നെ അപൂർവമായി ഒരു കലണ്ടർ മാസത്തിൽ തന്നെ രണ്ട് പൗർണമി വരാറുണ്ട്. ഇങ്ങനെ ഒരു മാസത്തിൽ ഉണ്ടാകുന്ന രണ്ടാമത്തെ പൗർണമിയെയാണ് ‘ബ്ലൂമൂൺ’ എന്ന് വിളിക്കുന്നത്. ഈ വർഷം മേയ് 1-ന് ‘ഫ്ലവർ മൂൺ’ എന്ന് വിളിക്കപ്പെടുന്ന ആദ്യത്തെ പൂർണചന്ദ്രൻ ദൃശ്യമായിരുന്നു. അതിനാൽ മേയ് 31-ലേത് ഒരു “പ്രതിമാസ ബ്ലൂ മൂൺ” ആയിരിക്കും.
ദൂരദർശിനികളുടെ സഹായമില്ലാതെ നഗ്നനേത്രങ്ങൾകൊണ്ടുതന്നെ ഈ ആകാശ വിസ്മയം കാണാൻ കഴിയും. എങ്കിലും ചന്ദ്രന്റെ ഉപരിതലം കൂടുതൽ വ്യക്തമായി കാണുന്നതിന് ബൈനോക്കുലറുകളോ ചെറിയ ടെലിസ്കോപ്പുകളോ ഉപയോഗിക്കാവുന്നതാണ്.
വളരെ അപൂർവമായി സംഭവിക്കുന്ന ഒന്നാണിത്. ഇനി 2028 ഡിസംബർ 31-നാണ് ഈ പ്രതിഭാസം കാണുക. ഇതിനുപുറമെ, നാല് പൂർണചന്ദ്രന്മാരുള്ള ഒരു സീസണിലെ മൂന്നാമത്തെ പൂർണചന്ദ്രനെ സൂചിപ്പിക്കുന്ന “സീസണൽ ബ്ലൂ മൂൺ” 2027 മേയ് 20-നും ദൃശ്യമാകുമെന്ന് ശാസ്ത്രജ്ഞർ പറയുന്നു. 2026-ൽ വാനനിരീക്ഷകർ ഏറ്റവും കൂടുതൽ കാത്തിരിക്കുന്ന ഒരു ആകാശ വിസ്മയം കൂടിയായിരിക്കും ഈ ബ്ലൂ മൂൺ.
